വയനാട് വിൻ്റ് ഫ്ലവർ റിസോർട്ടിൽ

8.1.2022

അങ്ങനെ ലോക്ഡൗണിന് ചെറിയൊരു ഇളവ് കിട്ടിയപ്പോൾ ഒന്ന് വയനാട് കയറി. ഇത്തവണ ഒരു റിസോർട്ടിൻ്റെ അനുഭവങ്ങളാണ് ആസ്വദിക്കാനുദ്ദേശിച്ചിരിക്കുന്നത്. വിൻറ് ഫ്ലവർ റിസോർട്ട്.

വയനാട്ടിലിപ്പോൾ സഞ്ചാരികളുടെ തിരക്ക് തുടങ്ങിയിരിക്കുന്നു. പൂക്കോട് ലെയ്ക്കിനടുത്തൊന്നും നിന്ന് തിരിയാൻ സ്ഥലമില്ലെന്ന് വേണമെങ്കിൽ പറയാം. അത്രക്കുണ്ട് സഞ്ചാരികൾ. റോഡ് സൈഡിലുള്ള തേയിലത്തോട്ടങ്ങളിലും അങ്ങനെ തന്നെയാണ്. അതു കൊണ്ട് തന്നെ, അധികം കറങ്ങാൻ നിന്നില്ല. നേരെ റിസോർട്ടിലേക്ക്.

ചൂണ്ടലിൽ നിന്നും അധികം ദൂരത്തല്ലാതെ, വൈത്തിരി താലൂക്കിലെ അന്നപൂർണ്ണ എസ്‌റ്റേറ്റിലുള്ള സുന്ദരമായൊരു റിസോർട്ടാണ് വിൻ്റ് ഫ്ലവർ.

വയനാടിൻ്റെ ഗ്രാമ കാഴ്ചകൾ കണ്ടു കൊണ്ട്, തേയിലത്തോട്ടങ്ങൾക്കിടയിലൂടെയാണ് യാത്ര. ഒരു വശത്ത് വിശാലമായ പുൽമൈതാനം കാണാം. അതിനടുത്തു കൂടെ വളരെ ശാന്തമായൊഴുകുന്ന ചെറിയൊരു അരുവി. കളി കഴിഞ്ഞ കുട്ടികളാണെന്ന് തോന്നുന്നു, അവിടെ അരുവിയിൽ കൈകാൽ കഴുകുന്നു. ചിലർ തോർത്ത് വിരിച്ച് മീൻപിടിക്കുകയാണെന്ന് തോന്നുന്നു. കുറച്ചകലെയായി, വെടിവട്ടവുമായിരുന്ന് തുണിയലക്കുന്ന സ്ത്രീകളെ കാണുന്നുണ്ട്.

ഒരു വലിയ കുന്നിൻ്റെ മുകളിലാണ് റിസോർട്ട്. ഹെയർ പിൻ വളവുകൾ പോലെ ചില കയറ്റങ്ങൾ കയറി വേണം അതിനടുത്തെത്താൻ.

മറ്റൊരു ലോകം തന്നെയാണെന്ന് പറയാം. റിച്ചെന്ന് തോന്നിക്കുന്ന ആമ്പിയൻസ്. വിശാലമായ റിസപ്ഷൻ. വെൽകം ഡ്രിങ്കിൻ്റെ അകമ്പടിയോടെ ഞങ്ങളവിടെ ഉപവിഷ്ടരായി. വാക്സിനേഷൻ സർട്ടിഫിക്കറ്റുകളെല്ലാം വെരിഫൈ ചെയ്തു കൊണ്ടിരിക്കുകയാണ്. അൽപ നേരം അവിടെ വിശ്രമിച്ചതിന് ശേഷം റൂമിലേക്ക് നടന്നു.

ഞങ്ങൾക്കനുവദിച്ച റൂമിനടുത്ത് തന്നെയാണ് സ്വിമ്മിംഗ് പൂൾ. വളരെ വലിയ പൂള് തന്നെയാണ്. കുട്ടികൾക്ക് സന്തോഷമായി, ഞങ്ങൾക്കും.

ഉച്ചകഴിഞ്ഞ സമയമായതുകൊണ്ടാകാം, വെള്ളത്തിന് അധിയായ തണുപ്പൊന്നുമില്ല. അതു കൊണ്ട്തന്നെ പൂളിൽ വളരെ നേരം ഉല്ലസിച്ചു. ശരിക്കു പറഞ്ഞാൽ ആറാടുകയായിരുന്നു അല്ലെങ്കിൽ അർമാദിക്കുകയായിരുന്നു എന്ന് വേണം പറയാൻ.

ഉച്ചഭക്ഷണം ഇവിടെ ഹോട്ടലിൽ തന്നെയാണ് ഏർപ്പാടാക്കിയിരിക്കുന്നത്. ഉച്ചഭക്ഷണത്തിനും രാത്രി ഭക്ഷണത്തിനും എക്സ്ട്രാ പേ ചെയ്യണം.

ടേബിൾ ടെന്നിസ് ,ബില്ല്യാഡ്സ് മുതലായ ഇൻഡോർ, ആക്ടിവിറ്റികൾ കുറേയുണ്ട്. കുട്ടികൾക്ക് കളിക്കുന്നതിനുള്ള പാർക് കുറച്ചകലെയാണ്. അവിടെ, അധികം സാധനങ്ങളൊന്നുമില്ല. എങ്കിലും ചെറിയ കുഞ്ഞുങ്ങൾക്ക് ഇഷ്ടപ്പെടും.

കുടുംബത്തോടൊപ്പം, ചെറുകിട ഹോട്ടലുകളിൽ പല സായന്തനങ്ങളും ചെലവഴിച്ചിട്ടുണ്ടെങ്കിലും, നല്ലൊരു സ്റ്റാർ റിസോർട്ടിൽ ഇതാദ്യമായാണ്. അതിൻ്റേതായ ത്രില്ലുണ്ട് മനസ്സിൽ.

നേരം ഇരുട്ടിയിരിക്കുന്നു. ഭംഗിയായി ഒരുക്കിയ നടപ്പാതയുടെ വശങ്ങളിലെ ബൾബുകളെല്ലാം പ്രകാശിച്ചു തുടങ്ങിയിരിക്കുന്നു. ഞങ്ങൾ അവിടെയാകെയൊന്ന് ചുറ്റിനടന്നു. വളരെ ഉയരത്തിൽ വളരുന്ന മരങ്ങളാണ്. അവക്കിടയിലെ ഇടവിള പോലെ കായ്ച് നിൽക്കുന്ന കാപ്പിച്ചെടികൾ.

വളരെ ശാന്തമായൊരു പശ്ചാത്തലത്തിൽ തന്നെയാണ് റൂമുകൾ ഉണ്ടാക്കി വെച്ചിരിക്കുന്നത്. അപ്പുറം തേയിലത്തോട്ടങ്ങൾ വിരിയിട്ട കുന്നിൻ ചരിവാണ്. അതിനിടയിൽ തലയുയർത്തി നിൽക്കുന്ന സിൽവർറോക്ക് മരങ്ങൾ.

രാത്രി ഭക്ഷണത്തിന് സമയമായിരിക്കുന്നു. ബഫറ്റ് (ബുഫെ) രീതിയിലുള്ള ഡിന്നറാണ്. ക്യാമ്പ്ഫയറും അറേഞ്ച് ചെയ്യുന്നുണ്ട്. ഭക്ഷണ വൈവിധ്യങ്ങൾ കൊണ്ട് സമ്പന്നമായൊരു അത്താഴം തന്നെയാണ്. പൊറോട്ടയും, ചപ്പാത്തിയും, വെള്ളപ്പവുമെല്ലാം ലൈവായിത്തന്നെയാണ് ചുട്ട് നൽകുന്നത്. ബ്രഡും, ഫ്രൈഡ് റൈസുമെല്ലാം ആവശ്യത്തിനെടുത്ത് കഴിക്കാം. ഒരു കോമ്പിനേഷനായി ചിലപ്പോൾ തോന്നാത്ത ഓംലറ്റ് പോലും, എല്ലാ പ്ലേറ്റിൻ്റെ കൂടെയും പോകുന്നുണ്ട്. ആവി പറക്കുന്ന ചിക്കൻ സൂപ്പിൻ്റെ പിന്നിലായിക്കൊണ്ട്, ഇവയെല്ലാം കഴിച്ച് തീർക്കുകയെന്നത് ഒരു ടാസ്ക് തന്നെയാണെന്ന് തോന്നി.

അപ്പോളും, ഹാളിൻ്റെ ഒരു ഭാഗത്തിരുന്ന് ആ കലാകാരൻ തൻ്റെ വയലിനിലൂടെ പശ്ചാത്തലത്തിന് മികവ് പകർന്ന് കൊണ്ടിരിക്കുന്നുണ്ടായിരുന്നു.

------------

9.1.2022

നേരം പുലരുകയാണ്. പുറത്ത് നല്ല മഞ്ഞുണ്ട്. അതിനൊത്ത തണുപ്പും.

രാവിലെ വണ്ടിയെടുത്ത് ഒന്ന് കറങ്ങാനിറങ്ങി. തേയിലത്തലപ്പുകളിൽ നിന്നും മഞ്ഞു തുള്ളികൾ ഇറ്റിക്കൊണ്ടിരിക്കുന്നുണ്ട്. മൂടൽമഞ്ഞിനെ വകഞ്ഞ് മാറ്റിക്കൊണ്ട്, ഹെഡ് ലൈറ്റ് തെളിയിച്ച്, നമ്മുടെ വണ്ടി വരുന്നത് കാണാൻ തന്നെ ഒരു രസമാണ്. നിശബ്ദതയിൽ തെളിഞ്ഞ് കേൾക്കുന്ന കുരുവികളുടെ ശബ്ദം പോലും, സംഗീതം പോലെ അനുഭവപ്പെടുന്നു.

കവലയിൽ സൊറ പറഞ്ഞിരിക്കുന്ന ദേശവാസികളുടെ ദൃശ്യങ്ങൾ, ഓർമ്മകളെ ദൂതകാലങ്ങളിലേക്ക് കൂട്ടിക്കൊണ്ട് പോകുന്ന പോലെ തോന്നി. വീടാണോ, കടയാണോ എന്നറിയില്ല, ആ കെട്ടിടത്തിന് മുന്നിലും ജനങ്ങൾ കോറിപ്പിടിച്ച് നിൽക്കുന്നത് കാണുന്നുണ്ട്.

ഒരു കറക്കത്തിന് ശേഷം തിരിച്ച് റൂമിലെത്തിയപ്പോളാണറിഞ്ഞത്, ചായപ്പൊടിയും പാൽപ്പൊടിയും മറ്റും കുരങ്ങന്മാർ മോഷ്ടിച്ചിരിക്കുന്നു. ജനലിൻ്റെ, തുറന്ന് കിടന്ന ഭാഗത്തൂടെ അവർ കൂട്ടമായെത്തി നടത്തിയ മോഷണമാണ്. ഭാഗ്യത്തിന് മറ്റൊന്നും നഷ്ടപ്പെട്ടിട്ടില്ല. കറങ്ങാൻ പോയപ്പോൾ വാങ്ങിയ പഞ്ചസാരയും ചായപ്പൊടിയും ഉപയോഗിച്ച് തൽകാലം ചായയുണ്ടാക്കി കുടിച്ചു. കെറ്റിലും വെള്ളവും റൂമിലുണ്ടായിരുന്നത് ഉപയോഗപ്പെട്ടു.

ബ്രേക്ക് ഫാസ്റ്റ്, കോംപ്ലിമെൻ്ററിയാണ്. വിഭവസമൃദ്ധമായ പ്രാതലിന് ശേഷം ഒരിക്കൽ കൂടെ സ്വിമ്മിംഗ് പൂളിനടുത്തേക്ക് നടന്നു.

ഇപ്പോൾ വെള്ളത്തിന് നല്ല തണുപ്പുണ്ട്. രാത്രി ക്ലോറിനേറ്റ് ചെയ്തതു കൊണ്ടാകാം, ചെറിയൊരു ചുവ തോന്നുന്നുണ്ട്.

കൂടുതൽ ആക്ടിവിറ്റികളിലൊന്നും പങ്കെടുത്തില്ലെങ്കിലും, ഫുൾ ടൈം എൻഗേജ്ഡായ ഒരു പ്രതീതിയാണ് മനസിന്. 

സമയം പതിനൊന്ന് മണിയായിരിക്കുന്നു. തിരിച്ച് പോക്കിൻ്റെ ആരംഭം കുറിക്കുകയാണ്. എല്ലാവരും കുറേയധികം ഫോട്ടോകളെടുക്കുന്ന തിരക്കിലാണ്. വേറിട്ടൊരനുഭവത്തെ വേണ്ടുവോളം മനസിൽ സൂക്ഷിക്കാനാവശ്യമായ ഫ്രെയിമുകൾ, ക്യാമറയോടൊപ്പം ഓരോരുത്തരും തൻ്റെ മനസിലേക്കും ആവാഹിക്കുകയാണ്. ഇനി തിരിച്ച് പോക്കിൻ്റെ നിമിഷങ്ങളാണ്.

ഞങ്ങൾ വിൻറ് ഫ്ലവർ റിസോർട്ടിനോട് വിട പറയുകയാണ്. ഇനി നേരെ തുഷാരഗിരി വെള്ളച്ചാട്ടം കാണാനാണ് പോകുന്നത്. അതിൻ്റെ വിശേഷങ്ങൾ ഇനി കാണാം.....

തുഷാരഗിരി: ഇവിടെ അമർത്തുക.