നരസി മുക്കിൻ്റെ ടോപ്പിലേക്ക്; അട്ടപ്പാടി

അട്ടപ്പാടി; ഒരു ഓർമ്മ: Part1

നാട് മുഴുവൻ കോവിഡ് ഭീതിയിലാണ്. എന്നിരിക്കിലും, മൂന്നാറും വയനാടും, അറിയാവുന്ന മറ്റ് വിനോദ സഞ്ചാര കേന്ദ്രങ്ങളിലെല്ലാം നല്ല തെരക്ക് തന്നെയാണെന്നാണറിഞ്ഞത്.

അതു കൊണ്ട് തന്നെ, ഇപ്രാവശ്യ യാത്ര എവിടേക്കാക്കും എന്നതിനെക്കുറിച്ച് അലോചിച്ചു കൊണ്ടിരിക്കുമ്പോളാണ്, "അയ്യപ്പനും കോശിയും" എന്ന സിനിമയിലെ ചില രംഗങ്ങൾ മനസിലേക്ക് കയറി വന്നത്. ആ സിനിമ കണ്ടതു മുതൽ, അട്ടപ്പാടി കാണണമെന്നും ആഗ്രഹം തുടങ്ങിയിരുന്നു. വിനോദ സഞ്ചാരത്തിനായി അധികം ജനങ്ങൾ തെരഞ്ഞെടുക്കാത്ത സ്ഥലമാണ് അട്ടപ്പാടി എന്നതും ഒരു ഫാക്ടർ തന്നെ. അതു കൊണ്ട് തന്നെ കൊറോണയെ പേടിക്കാതെ പോയി വരാൻ അട്ടപ്പാടി തന്നെയാണ് നല്ലതെന്ന് തോന്നി.

പിന്നെ കൂടുതലൊന്നും ആലോചിച്ചില്ല. "ഡസ്റ്റിനേഷൻ ഫിക്സഡ്."

നഗരങ്ങളിലോ, പട്ടണങ്ങളിലോ ജീവിക്കുന്നവരെ സംബന്ധിച്ചിടത്തോളം, അട്ടപ്പാടി, വർഷങ്ങളുടെ പുറകിലാണെന്ന് തോന്നിയേക്കാം. അവരെ കുറ്റപ്പെടുത്താനാവില്ല. തെരക്കില്ലാത്ത, ശബ്ദകോലാഹലങ്ങളില്ലാത്ത, വലിയ വലിയ കെട്ടിട സമുച്ചയങ്ങളില്ലാത്ത സ്ഥലം. എന്നാൽ ശാന്തവും, വിശാലവും, സുന്ദരവുമായ പ്രകൃതിയുടെ പച്ചപ്പ്. നിഷ്കളങ്കരായ തദ്ദേശവാസികളുടെ ജീവിത സാഹചര്യങ്ങൾ. ഇവയെല്ലാം കണ്ടും ആസ്വദിച്ചും കൊണ്ടുള്ള യാത്ര ഒരു പ്രത്യേക അനുഭവം തന്നെയായിരിക്കും.

യാത്ര: (23/12/2020)

കോഴിക്കോട് പാലക്കാട് ദേശീയപാതയിൽ, (പാലക്കാട് ഭാഗത്തേക്ക് പോകുമ്പോൾ) മണ്ണാർകാട് നിന്നും ഇടത്തോട്ടുള്ള റോഡിലൂടെയാണ് നമുക്ക് പോകേണ്ടത്. മണ്ണാർകാട് ബസ് സ്റ്റാൻ്റിൽ നിന്നും അൽപം കൂടെ മുന്നോട്ട് പോകുമ്പോൾ ഇടത് വശത്തേക്ക് കാണുന്ന റോഡാണ് അട്ടപ്പാടിയിലേക്കുള്ളത്. അട്ടപ്പാടി വഴി കോയമ്പത്തൂരിലേക്കുള്ള റോഡാണത്. ബസ്സ്റ്റാൻ്റെത്തുന്നതിന് മുമ്പ്, ഇടത്തോട്ട് കാണുന്ന ബൈപാസിലൂടെയും ഈ റോഡിലേക്കെത്താം. ടൗണിലെ തെരക്കൊഴിവാക്കി യാത്ര ചെയ്യാൻ ഈ വഴി നല്ലതായിരിക്കും.

അൽപദൂരയാത്രയിൽത്തനെ ഞങ്ങൾ ചുരത്തിലെ ഒരു വ്യൂ പോയിൻ്റിലെത്തി. നല്ല കാഴ്ചകൾ. ഇളം തെന്നൽ. ചെറിയ മഞ്ഞ് പെയ്യുന്നുണ്ട്. സുഖകരമായ കാലാവസ്ഥ.

ചുരവും പിന്നിട്ട് വീണ്ടും കുറേ ദൂരം. ഞങ്ങൾ ഗൂളിക്കടവ് എത്തിയിരിക്കുന്നു. ചെറിയൊരു ടൗൺ. അഗളി PWD റെസ്റ്റ് ഹൗസ് ഇവിടെ അടുത്താണ്. ചുരുങ്ങിയ ചെലവിൽ താമസിക്കുന്നതിന് ഏതൊരാൾക്കും PWD റെസ്റ്റ് ഹൗസ് തെരഞ്ഞെടുക്കാം. ഒരു റൂമിന് 400 രൂപ മാത്രമേ ദിവസ വാടകയുള്ളു. സംസ്ഥാന സർക്കാർ ഉദ്യോഗസ്ഥർക്ക് അനൗദ്യോഗിക യാത്രയിൽ പകുതി വാടക നൽകിയാൽ മതി.

നരസി മുക്ക്:

അട്ടപ്പാടിയിലെ സുന്ദരമായൊരു വ്യൂ പോയിൻ്റാണിത്. അട്ടപ്പാടിയുടെ ഭൂരിഭാഗം പ്രദേശങ്ങളെയും കാണത്തക്ക രീതിയിൽ ഒരു 360 ഡിഗ്രി വ്യൂ നമുക്കിവിടെ ആസ്വദിക്കാം.

ഗൂളിക്കടവിൽ നിന്നും കോയമ്പത്തൂർ റോഡിൽ കുറച്ച് ദൂരം പിന്നിടുമ്പോൾ ഇടത്തോട്ട് ഒരു ചെറിയ റോഡ് കാണാം. അതിലൂടെയാണ് നരസി മുക്കിലേക്ക് പോകേണ്ടത്. ഈ റോഡിൻ്റെ തുടക്കത്തിൽത്തന്നെ വലത് വശത്താണ് നേരത്തെ പറഞ്ഞ PWD റെസ്റ്റ് ഹൗസ് .

ചുരം പോലെ തോന്നിക്കുന്ന ഇടുങ്ങിയ റോഡുകൾ പിന്നിട്ട് ഞങ്ങൾ നരസി മുക്കിലെത്തിയിരിക്കുന്നു. മുന്നിൽ കാണുന്നത് വലിയൊരു കുന്നാണ്. ഒരു മൊട്ടക്കുന്ന്. കഷണ്ടിയിലെ രോമങ്ങൾ പോലെ അവിടവിടെയായി ചില ചെറു മരങ്ങൾ കാണുന്നുണ്ട്. അധികം കുത്തനെയല്ലാത്ത പാത. കയറാൻ വലിയ ബുദ്ധിമുട്ടൊന്നും തോന്നുകയില്ല. കാലാവസ്ഥ, തീർത്തും ഞങ്ങൾക്ക് അനുകൂലമാണെന്ന് തോന്നി. വെയിലില്ല. മാത്രമല്ല, തണുത്ത ഇളം കാറ്റടിക്കുന്നുമുണ്ട്. അതുകൊണ്ട് തന്നെയാകാം, ആർക്കും തന്നെ ഉന്മേഷക്കുറവൊന്നുമില്ല.

അയ്യപ്പനും കോശിയും സിനിമയിൽ, അയ്യപ്പൻ നായരുടെ ഭാര്യയെ, പൊലീസ് അറസ്റ്റ് ചെയ്തു കൊണ്ട് പോകുന്ന രംഗങ്ങൾ ചിത്രീകരിച്ചത് ഇവിടെയാണ്. തൊട്ടിലും, തൊട്ടിൽ കെട്ടിയ മരവും, സിനിമയിലഭിനയിച്ചതിൻ്റെ അഹങ്കാരത്തിൽ തലയുയർത്തി നിൽക്കുകയാണെന്ന് തോന്നി. അവരുടെ വീടിൻ്റെ സെറ്റാണെന്ന് തോന്നുന്നു, അടുത്ത് തകർന്ന് കിടക്കുന്നുണ്ട്. അതിനടുത്ത് നിന്ന് ഒന്ന് രണ്ട് ഫോട്ടോസെടുത്തു.

ഇനിയാണ് കയറ്റം. പക്ഷെ അധികം കുത്തനെയല്ല. ഇനിയുള്ള ഭൂമി, വനംവകുപ്പിൻ്റേതാണെന്ന് ഓർമ്മിപ്പിക്കുന്ന വലിയൊരു ബോർഡ് കാണുന്നുണ്ട്. അതു കൊണ്ട് തന്നെ, ഇവിടെ വരെ വന്ന് കാഴ്ചകളാസ്വദിച്ച് തിരിച്ച് പോകുന്നതാണ് നല്ലത്.

കുന്നിൻചരിവിൽ നല്ല പച്ചപ്പുണ്ട്. അതിൽ മേഞ്ഞ് നടന്ന് തിന്നുന്ന കന്നുകാലിക്കൂട്ടങ്ങൾ. മനസ് നിറക്കുന്ന കാഴ്ചകൾ തന്നെ!

പല സ്ഥലങ്ങളിലായി ഫോറസ്റ്റിൻ്റെ ജണ്ടകൾ - അതിരുകൾ സൂചിപ്പിക്കുന്ന കൽ നിർമ്മിതികൾ - കാണാം.

ഇവിടെ നിന്നുള്ള കാഴ്ചകൾ അവാച്യമെന്നെ പറയേണ്ടു. വളരെ ദൂരെയായൊരു ചർച്ച് കാണുന്നുണ്ട്. അവിടെയാണ് ഗൂളിക്കടവ് ടൗൺ. അവിടെ നിന്നും ഇങ്ങോട്ടുള്ള പാതയാണ് ആ തിരിഞ്ഞും വളഞ്ഞും കാണപ്പെടുന്നത്. അതിലൂടെയാണ് നമ്മളിപ്പോൾ ഡ്രൈവ് ചെയ്ത് വന്നത്. വിശാലമായ താഴ് വര. അതിനപ്പുറത്തും വലിയകുന്നുകൾ തന്നെ. ഇവിടെയിങ്ങനെ കാറ്റു കൊണ്ടിരിക്കാൻ വളരെ രസമാണെന്ന് തോന്നി. സമയം പോകുന്നതറിയില്ല.

ഇന്നിനി കൂടുതൽ കറക്കമില്ല. നേരെ റൂമിലേക്ക് പോകുകയാണ്. പുലിയപ്പതി എന്ന സ്ഥലത്ത് ഒരു ഫാം ഹൗസാണ് ബുക്ക് ചെയ്തിരിക്കുന്നത്. വളരെ വിശാലമായൊരു വനമേഖലയിൽ ഒറ്റപ്പെട്ടൊരു താമസം. "പൊളിക്കും". അത് തികച്ചും വേറിട്ടൊരനുഭവം തന്നെയായിരിക്കും. ഇനി അതിൻ്റെ വിശേഷങ്ങൾ പറയാം.....

(തുടരും...)

Attapadi part 2 press here

Attapadi part 3 press here